Nakibahagi ang Pamahalaang Panlalawigan ng Maguindanao del Sur sa pagdiriwang ng ika-35 Founding Anniversary ng Bayan ng Gen. Salipada K. Pendatun (GSKP) sa pamamagitan ng pagsasagawa ng unang Medical Mission ng probinsya para sa taong 2026.

Sa naturang aktibidad, naghatid ang pamahalaang panlalawigan ng libreng medical consultation, basic health services, at iba’t ibang tulong pangkalusugan para sa mga residente ng GSKP. Layunin ng medical mission na mailapit ang serbisyong pangkalusugan sa komunidad, lalo na sa mga higit na nangangailangan.

Sa ilalim ng pamumuno ni Datu Ali Midtimbang, muling pinagtibay ng pamahalaang panlalawigan ang paninindigan nitong unahin ang kalusugan at kapakanan ng mamamayan bilang pundasyon ng tunay na kaunlaran. Ang aktibidad ay nagsilbing simbolo ng isang pamahalaang kumikilos—hindi lamang nagsasalita—upang mapaangat ang kalidad ng buhay ng mga Maguindanaon.

Mas naging makabuluhan ang selebrasyon ng anibersaryo ng GSKP dahil sa pagsabay nito sa serbisyong medikal, na nagpapaalala na ang tunay na pagdiriwang ay yaong may kasamang malasakit, pagbabahagi, at pagkakaisa.