Nagkaroon ng mahalagang pakikipag-ugnayan ang pamunuan ng MILF-Ad Hoc Joint Action Group (AHJAG) sa Bureau of Corrections sa New Bilibid Prison upang talakayin ang kalagayan at legal na proseso para sa mga MILF-affiliated Persons Deprived of Liberty (PDLs).

Pinangunahan ang pagbisita ni Anwar S. Alamada, kasama si Badrodin Mangindra, kung saan tinalakay ang estado ng mga kaso ng mga MILF PDLs at ang mga posibleng hakbang upang mapabilis ang kanilang legal na proseso.

Kabilang sa mga napag-usapan sa nasabing engagement ang mga legal na mekanismo tulad ng Good Conduct Time Allowance (GCTA) at iba pang remedyo na maaaring makatulong sa mga kwalipikadong bilanggo upang makamit ang kanilang posibleng paglaya alinsunod sa umiiral na batas.

Ayon sa MILF-AHJAG, ang naturang pagbisita ay bahagi ng patuloy na pagsisikap ng organisasyon na mabigyan ng kaukulang legal na tulong at koordinasyon sa mga kinauukulang institusyon ang mga MILF-affiliated PDLs, kasabay ng pagsusulong ng makatarungan at maayos na proseso sa ilalim ng umiiral na sistema ng hustisya.

Binigyang-diin din na ang ganitong hakbang ay mahalaga upang matiyak na ang mga kwalipikadong indibidwal ay mabigyan ng pagkakataong makasailalim sa tamang legal na proseso at makatanggap ng mga benepisyong itinakda ng batas.