KAPALAWAN, MAGUINDANAO DEL SUR – Nakatanggap ng buwanang pinansyal na tulong ang 110 solo parents sa bayan ng Kapalawan sa ilalim ng DAKILA Bangsamoro Program ng Ministry of Social Services and Development (MSSD) noong Hunyo 13, 2026.

Bawat benepisyaryo ay tumanggap ng ₱1,000 buwanang grant na layuning makatulong sa kanilang pang-araw-araw na gastusin at masuportahan ang kanilang mga pamilya.

Kasabay ng pamamahagi ng ayuda, nagsagawa rin ang MSSD ng Family Development Session (FDS) kung saan tinalakay ang mahahalagang impormasyon tungkol sa DAKILA Bangsamoro Program at mga probisyon ng Solo Parents’ Welfare Act.

Nagsilbi rin ang aktibidad bilang orientation para sa mga bagong benepisyaryo at refresher session para sa mga patuloy na tumatanggap ng programa. Layunin nitong palawakin ang kanilang kaalaman hinggil sa kanilang mga karapatan, responsibilidad, at iba pang serbisyong maaaring ma-access bilang mga solo parent.

Sa pamamagitan ng ganitong mga programa, patuloy na isinusulong ng MSSD ang pagbibigay ng suporta at kapakanan sa mga solo parent, habang pinapalakas ang kanilang kakayahang matugunan ang pangangailangan ng kanilang mga pamilya at mapabuti ang kanilang kabuhayan.