Sinabi ni Vice President Sara Duterte na hindi na siya nagugulat sa bagong pagbanggit ng ilang kongresista tungkol sa impeachment laban sa kanya. Ayon sa kanya, paulit-ulit itong lumilitaw tuwing malapit nang ipasa ang pambansang budget.

Binalikan niya ang rebelasyon noong 2024 na may nag-aalok umano ng lagda para sa impeachment kapalit ng pondo. Para kay Duterte, pinatutunayan nito na ang mga reklamong ipinupukol sa kanya ay hindi dahil sa prinsipyo kundi dahil sa pulitikal na interes.

Dagdag pa niya, walang naging imbestigasyon sa umano’y bilyong pisong ginamit sa pulitikal na laban, na sana’y para sa serbisyo publiko.

Tinawag niyang maling paggamit ng impeachment ang ginagawa ngayon at hiniling sa mga pulitikong sangkot na huwag gawing kasangkapan ang prosesong ito.

Giit niya, handa siyang sagutin ang anumang totoong alegasyon, ngunit hindi raw siya mananahimik sa harap ng pulitikang pinapaikot ng pondo.