Sa kanyang matalas na komentaryo, binigyang-diin ni Atty. Jamal Latiph na ang serye ng pagkaantala sa pagpasa ng districting law sa Bangsamoro Transition Authority (BTA) ay nag-iiwan ng impresyong posibleng hindi aksidente ang lahat, kundi isang sinadyang estratehiya na maaaring magdulot ng malaking pinsala sa integridad ng 2026 BARMM Parliamentary Elections.

Ayon kay Latiph, may kumakalat na pananaw na maaaring inaasinta ng ilang sektor ang pag-ubos ng oras, pagbagal ng legislative calendar, at pag-asa na ang Kongreso mismo ang gigibo ng paraan upang ma-extend o ma-synchronize ang halalan sa 2028. Ngunit para sa kanya, malinaw na maling assumption ito—mula sa legal hanggang pampulitikang aspeto.

Binanggit niya na walang nakabinbing panukalang batas sa Kongreso na sumusuporta sa ideya ng extension o synchronization. Bagkus, ang posisyon ng ilang mambabatas ay simple at direkta:
Hindi maaaring pag-usapan ang extension hangga’t hindi naipapasa ang districting law, dahil magiging unconstitutional ang anumang electoral adjustment kung walang malinaw na delineation ng mga distrito.

Dagdag pa niya, ang desisyon ng Supreme Court sa Lanang Jr. at Macapaar case ay pinal at hindi na mababago. Ang paggamit umano ng “pending motion”, “further study”, o paghahanap ng “political consensus” bilang dahilan sa pagbagal ay walang legal na bigat.
Para kay Latiph, ang utos ng korte ay malinaw—kumilos ang BTA, hindi bukas, kundi ngayon.

Isang malaking punto ng babala ni Latiph ay ang papalapit na filing of Certificates of Candidacy sa Enero 2026. Nang walang districting law bago ang nasabing petsa, ang buong parliamentary election process ay maaaring mabutas, magulo, o maharap sa seryosong legal challenges—isang sitwasyong ayaw ng anumang korte na mangyari.

Naniniwala si Latiph na kung tunay na sinasadya ang pagbagal, ang institusyong mismong nakabatay sa representasyon at batas ang malalagay sa panganib. Sa tradisyong legal ng bansa, pinaaalala niya na hindi nanonood ang hukuman kapag pumapalya ang isang legislative body—kumakilos ito para maiwasan ang constitutional vacuum.

Sa kanyang pagtatapos, malinaw ang mensahe:
May isa na lamang legal at responsableng hakbang—ipasa agad ang districting law.

Anya, ang anumang karagdagang pagkaantala ay hindi na estratehiya kundi banta sa proseso, batas, at kinabukasan ng institusyon.