Binuksan ni Abas ang kanyang talumpati sa isang pagbati ng kapayapaan, bago diretsahang ipahayag na ang kanyang pagtakbo ay hindi lamang isang simpleng desisyon, kundi isang malinaw na paninindigan para sa mas maayos, mas tapat, at mas konkretong serbisyo publiko.

Hindi pangako kundi pakikinig ang naging pundasyon ng kanyang mensahe. Ibinahagi niya ang kanyang naging “listening tour” sa iba’t ibang barangay, kung saan personal niyang narinig ang hinaing ng mga mamamayan mula sa kakulangan ng oportunidad, pagtaas ng presyo ng bilihin, hanggang sa pangangailangan sa edukasyon, kalusugan, kabuhayan, at imprastruktura.

Sa halip na magpakitang perpekto, iginiit ni Abas ang kanyang pangakong pamumuno na nakabatay sa konkretong plano, disiplina sa pagpapatupad, at serbisyong may talino at malasakit. Binigyang-diin din niya ang kahalagahan ng patas na paglilingkod, walang pinipili, at may malinaw na direksyon.

Hindi rin niya itinangging ang laban ay hindi para sa iisang tao lamang. Ayon kay Abas, kasama niya sa adhikaing ito ang iba’t ibang sektor kabilang na ang mga lider mula sa barangay, organisadong grupo, at ang UBJP na handang magtrabaho hindi lamang tuwing kampanya kundi araw-araw para sa distrito.

Sa kabuuan, inilatag niya ang kanyang kandidatura bilang simula ng isang mas malawak na kilusan isang pagkakaisa tungo sa pagbabagong mararamdaman ng bawat pamilya sa Unang Distrito lungsod.

Sa pagtatapos, iniwan niya ang isang malinaw na mensahe na handa na siyang magsilbi, at alam niya na sa laban na ito, hindi siya nag-iisa. Kasama niya ang mamamayan na matagal nang naghihintay ng konkretong aksyon at direksyon.