Ibinahagi ni Member of Parliament Suharto Esmael, na nagsisilbi ring Deputy Information Officer ng United Bangsamoro Justice Party (UBJP), ang kanyang paglahok sa walkthrough ng BARMM Parliamentary Election (PE) Data Center 3, isa sa mga pasilidad kung saan tinatanggap at iniimbak ang mga transmitted election results at iba pang election data.

Ayon kay Esmael, kinatawan niya ang UBJP sa nasabing aktibidad bilang bahagi ng paghahanda para sa kauna-unahang Bangsamoro Parliamentary Elections.

Ipinaliwanag niya na ang Data Center ay may mahalagang papel sa pagtanggap, pagproseso, at pag-iingat ng mga election returns na ipapadala mula sa iba’t ibang polling precincts sa buong Bangsamoro Region.

Dagdag pa niya, umaasa ang UBJP na mabibigyan ito ng akreditasyon bilang dominant majority party, na magbibigay daan upang magkaroon ng access sa live transmitted election results sa panahon ng halalan.

Binigyang-diin ni Esmael na ang naturang hakbang ay mahalaga upang mapalakas ang transparency, accountability, at tiwala ng publiko sa magiging takbo ng kauna-unahang parliamentary elections sa Bangsamoro.

Ayon sa kanya, ang maayos na election monitoring system ay makatutulong upang matiyak ang integridad ng proseso at mapangalagaan ang boses ng bawat botante sa makasaysayang halalang nakatakdang idaos sa rehiyon.