Isang makasaysayang groundbreaking ceremony ang isinagawa noong Nobyembre 7, 2025, sa Schools Division Office of Sulu, bilang hudyat ng panibagong yugto ng pag-unlad sa sektor ng edukasyon sa lalawigan.

Sa ilalim ng proyektong ito, itatayo ang dalawang-palapag na apat na silid-aralan at covered court na may bleachers at stage sa Kan Sipat Elementary School, at isang-palapag na dalawang silid-aralan sa Rasul Elementary School.

Ang kabuuang pondong ₱25,115,913.14, mula sa SDF 2023 at GAAB 2025, ay magsisilbing puhunan sa kinabukasan ng mga batang Suluanong mag-aaral.

Para sa mga guro at magulang, higit pa ito sa mga pader at bubong — ito ay simbolo ng pag-asa, kaunlaran, at pangarap para sa susunod na henerasyon ng Bangsamoro.

Ang mga bagong pasilidad ay inaasahang magbibigay ng mas maayos, ligtas, at inspiradong kapaligiran sa pag-aaral, alinsunod sa layunin ng MBHTE-BARMM na itaguyod ang “education for all” sa bawat sulok ng rehiyon.