Isang makabuluhang tagumpay ang muling naitala ng Cotabato City matapos nitong opisyal na pumasa sa 2025 Child-Friendly Local Governance Audit (CFLGA)—isang pambansang mekanismong sumusukat sa kahandaan at kakayahan ng mga LGU na magpatupad ng polisiya at programang nagtataguyod ng karapatan at kapakanan ng kabataan.

Batay sa inilabas na resulta, nakapagtala ang lungsod ng 74.00 rating at 92.50 percent compliance score, isang malinaw na patunay sa epektibong pagpapatupad ng child-centered governance at serbisyo publiko.

Pinuri ng pamahalaang lungsod ang lahat ng ahensyang katuwang—mula sa barangay officials, social welfare officers, education sector, health workers, hanggang sa mga civil society partners—na hindi tumitigil sa pagtataguyod ng ligtas, protektado, at nurturing environment para sa lahat ng batang Cotabateño.

Inihayag ng city government na mananatili itong nakatuon sa patuloy na pagpapalakas ng mga programang pang-edukasyon, pangkalusugan, pang-proteksiyon, at iba pang interventions na nakalinya para sa komprehensibong pag-unlad ng kabataan.

“Padayon sa serbisyo para sa kabataan,” giit ng pamunuan, habang nagbubukas ang lungsod ng panibagong yugto ng mas matatag, mas inklusibo, at mas child-friendly na pamamahala.