Datu Anggal Midtimbang, Maguindanao del Sur — Sa pagdiriwang ng State of the Children Address at Children’s Month, binigyang-pugay ni Mayor Datu Nathaniel Midtimbang ang papel ng mga magulang, guro, at buong komunidad sa paghubog ng kinabukasan ng kabataan.

Sa kanyang mensahe, sinabi ng alkalde na ang kabataan ang tunay na pag-asa ng bayan at kailangan silang gabayan nang maayos upang masiguro ang kanilang tagumpay. Pinuri niya ang mga guro bilang “second parents” na patuloy na naglilingkod at nagsisilbing sandigan ng edukasyon sa mga kabataan.

Ipinamahagi rin ng Provincial Government ang iba’t ibang suporta para sa mga daycare learners, kabilang ang school bags, toys, supplies, at chairs para sa daycare centers. Ayon sa alkalde, layunin nitong mas mapabuti ang pasilidad ng early learning centers na matagal nang nangangailangan ng atensyon.

Hinimok ni Mayor Midtimbang ang mga barangay daycare workers na aktibong tukuyin ang mga kakulangan upang mabigyan agad ng solusyon ng LGU. Muli niyang tiniyak na ang sinumang pumapasok sa Datu Anggal Midtimbang ay itinuturing nang kabahagi ng kanilang komunidad.

Nagpaabot siya ng pasasalamat sa lahat ng nakibahagi sa selebrasyon at sa mga sumuporta sa State of the Children Address ng Provincial Governor.