Bilang pagkilala sa mga empleyadong nagsakripisyo at tumulong sa pagtatatag ng Bangsamoro government, inihain ni Member of Parliament Susana Anayatin ang Parliament Bill No. 405, o ang “BTA Gratuity Fund Act.”

Layunin ng panukalang batas na maglaan ng pinansyal na tulong para sa mga kawani ng Bangsamoro Transition Authority (BTA) na magtatapos ang serbisyo kasabay ng pagtatapos ng transition period ng Bangsamoro Autonomous Region in Muslim Mindanao (BARMM).

Sa ilalim ng panukalang ito, bawat kuwalipikadong empleyado ay makatatanggap ng isang buwang sahod para sa bawat taon ng serbisyo, bilang pagkilala sa kanilang kontribusyon at dedikasyon. Kahit anim na buwang serbisyo ay ituturing na isang buong taon — isang paraan upang hindi maikaila ang halaga ng bawat sakripisyo sa panahon ng transisyon.

Ang panukala ay sumasalamin sa parehong espiritu ng pagbibigay-galang na ginawa noong 2019 para sa mga dating kawani ng Autonomous Region in Muslim Mindanao (ARMM), kung saan itinaguyod din ang ganitong klaseng benepisyo.

Pangungunahan ng Ministry of Finance, Budget and Management (MFBM) ang implementasyon, katuwang ang HRMU at CSC-BARMM, upang matiyak ang maayos, patas, at makataong proseso ng pagbibigay ng benepisyo.

Para kay MP Anayatin, ang panukalang ito ay higit pa sa ayuda — ito ay pagpapahalaga sa serbisyo, dedikasyon, at moral na pamamahala ng mga kawani na naging bahagi ng kasaysayan ng Bangsamoro.