Patuloy na pinatitibay ng Bangsamoro Autonomous Region in Muslim Mindanao (BARMM) ang reputasyon nito bilang mabilis na umuusbong na investment hub matapos aprubahan ang dalawang bagong pamumuhunan na nagkakahalaga ng ₱64 milyon, na lilikha ng 106 bagong trabaho bago matapos ang taon. Inanunsyo ito sa isinagawang 5th Board Meeting ng Bangsamoro Board of Investments (BBOI) nitong Martes, Nobyembre 25.

Kabilang sa mga bagong aprubadong proyekto ang ₱50-milyong logistics investment sa Tawi-Tawi, na magbubukas ng 44 trabaho. Layunin nitong palakasin ang inter-island water passenger transport—isang mahalagang bahagi ng konektibidad, mobilidad, at pag-unlad ng ekonomiya sa isla.

Inaprubahan din ang ₱14-milyong Shariah-compliant arrangements project sa Cotabato City na lilikha ng 62 trabaho. Ang proyekto ay magpapalawak ng access sa micro Takaful products upang higit pang patibayin ang Islamic finance ecosystem sa rehiyon.

Ang mga bagong pamumuhunang ito ay dagdag sa ₱5 bilyon na kabuuang investments na naitala noong Oktubre 20, 2025—patunay na patuloy na tumataas ang kumpiyansa ng mga mamumuhunan sa BARMM, lalo na sa ilalim ng matatag na pamamahala na nakatuon sa transparency, accountability, at regional stability.

Dumalo sa pagpupulong sina BBOI Chairperson Mohamad Omar Pasigan, Board of Governors Datu Habib Ambolodto at Manan Baraguir, at si Atty. Salem Barrat mula sa Ministry of Finance, Budget, and Management (MFBM) bilang kinatawan ni Minister Ubaida Pacasem, kasama ang mga opisyal ng dalawang aprubadong investments.

Ipinahayag ng BBOI na ang mga bagong proyektong ito ay simbulo ng nagpapatuloy na economic momentum ng Bangsamoro at ng tumitinding pagtitiwala ng pribadong sektor. Nakaangkla rin ito sa adbokasiya ni Chief Minister Abdulraof Macacua para sa Moral Governance at Mas Matatag na Bangsamoro campaign—mga haliging humuhubog sa BARMM’s Economic Jihad tungo sa matatag, masagana, at self-reliant na rehiyon.

Tiniyak ng BBOI ang tuloy-tuloy na pagsuporta sa mga pamumuhunang nagtataguyod ng sustainable development, mas maraming kabuhayan, at pagtutugma sa Strategic Investment Priority Plan (SIPP)—bilang bahagi ng misyon nitong maghatid ng mas inklusibong ekonomiyang Bangsamoro