Bilang bahagi ng patuloy na pagsuporta sa mga potensyal na Proponent Groups (PGs) sa lalawigan, nagsagawa ang Provincial Government of Maguindanao del Sur sa pamamagitan ng Office of the Provincial Agriculturist (OPAG) ng validation at coordination meeting kasama ang South Upi Rubber Development Cooperative.

Isinagawa ang aktibidad sa pakikipag-ugnayan ng Regional Project Coordination Office (RPCO) at ng Municipal Local Government Unit (MLGU) upang talakayin ang mga kinakailangang kwalipikasyon ng kooperatiba para makasama sa mga susunod na programang pang-agrikultura at development projects ng pamahalaan.

Sa pulong, binigyang-diin ang mahahalagang rekisitos tulad ng kumpletong legal na dokumento, kakayahang pang-organisasyon, at pagkakatugma ng mga panukalang proyekto sa mga layunin ng rehiyonal at panlalawigang agricultural development.

Ayon sa OPAG, mahalagang matiyak na handa at kwalipikado ang mga lokal na kooperatiba upang maging aktibong katuwang ng pamahalaan sa pagpapaunlad ng sektor ng agrikultura, partikular sa pagpapataas ng ani, pagpapabuti ng kabuhayan ng mga magsasaka, at pagpapalakas ng lokal na ekonomiya.