Pinangunahan ni LMP President Mayor Nathaneil S. Midtimbang ang Turn-Over Ceremony of Loose Firearms bilang bahagi ng mas pinaigting na kampanya ng Pambansang Pamahalaan laban sa ilegal na armas, na isinagawa noong Enero 20, 2026 sa Datu Anggal Midtimbang, lalawigan ng Maguindanao del Sur.

Ang programa ay isinakatuparan sa malapit na koordinasyon ng lokal na pamahalaan, sa pangunguna ni Midtimbang, at ng mga puwersa ng militar at kapulisan, kabilang si Edgar Catu, kasama ang iba pang kinatawan ng Armed Forces of the Philippines at Philippine National Police.

Sa naturang seremonya, iba’t ibang uri ng loose firearms ang boluntaryong isinuko ng mga mamamayan mula sa iba’t ibang barangay na sakop ng Bayan ng Datu Anggal Midtimbang. Ayon sa mga opisyal, layunin ng aktibidad na mapanatili ang kapayapaan, kaayusan, at kaligtasan ng publiko, gayundin ang maiwasan ang karahasang dulot ng ilegal na armas sa komunidad.

Dumalo rin sa programa ang mga Punong Barangay ng DAM, kabilang sina Datu Kiko Midtimbang, Datu Jamir Sulatan, Daud Giyama, Salipada S. Kayog, Mojahid Tanto, Kuyo S. Lampay, at Esmail Salik, bilang pagpapakita ng kanilang buong suporta sa adbokasiya para sa isang ligtas na pamayanan.

Ayon sa mga opisyal, ang matagumpay na pagsasagawa ng turn-over ceremony ay patunay ng nagkakaisang pagkilos ng lokal na pamahalaan, mga ahensiyang panseguridad, at mamamayan, na may iisang layunin—ang makamit ang isang mapayapa, maayos, at maunlad na komunidad sa Maguindanao del Sur.