Enero 26, 2026 — Nakiisa si Hisham S. Nando, Bise Gobernador ng Maguindanao del Sur, sa unang Qur’an Memorization Recognition Ceremony ng Markadz Hadjiah Saguirah Kali Litahfidhil Qur’anil Kareem Qismul-Banat na ginanap sa Quarry, Bulod, General Salipada K. Pendatun.

Sa kanyang mensahe, binigyang-diin ni Vice Governor Nando ang kahalagahan ng Banal na Qur’an bilang pundasyon ng pananampalataya, mabuting asal, at matuwid na pamumuhay. Pinuri niya ang mga mag-aaral sa kanilang sipag, disiplina, at pagtitiyaga sa pagmememorya ng Qur’an, at hinikayat silang ipagpatuloy ang mas malalim na pag-unawa at pagsasabuhay ng mga aral ng Islam.

Ipinahayag din ng Bise Gobernador ang kanyang taos-pusong pasasalamat sa Kali family sa pagtatatag ng institusyon at sa patuloy na pagsuporta sa edukasyong Islamiko, na aniya’y mahalagang ambag sa paghubog ng mga kabataang may matibay na pananampalataya at moralidad.

Pinangunahan ang programa ng mga asatidz ng General Salipada K. Pendatun, na patuloy na nagsusulong ng pagpapatibay ng Islamic education at paglinang ng espiritwal na kamalayan ng kabataan sa komunidad.

Bilang pagpapakita ng suporta sa edukasyon at empowerment ng kababaihan, dumalo rin si Nemia K. Nando, maybahay ng Bise Gobernador, kasama si Bai Faujiah B. Mangelen, na kapwa nagpaabot ng pakikiisa sa mga inisyatibang nagpapalakas sa kabataang kababaihan sa pamamagitan ng faith-based learning.

Ang unang Qur’an Memorization Recognition Ceremony na ito ay naging pagdiriwang ng pananampalataya, kaalaman, at pag-asa, at patunay ng patuloy na pagkakaisa ng pamahalaan, pamilya, at komunidad sa pagtataguyod ng edukasyong Islamiko sa Maguindanao del Sur.