Isang matibay na hakbang sa pagpapalalim ng kamalayang pampulitika at pagpapahalagang moral sa antas-komunidad ang isinagawa ng Office of MP Said Shiek (OMPSS), katuwang ang Lanao College of Criminology, sa pamamagitan ng Bangsamoro 101: Information Drive on Bangsamoro History and Moral Governance noong Enero 22, 2026 sa Barangay Buadi Amloy, Masiu, Lanao del Sur.

Nilalaman ng information drive ang masinsinang talakayan sa makasaysayang pakikibaka ng Bangsamoro, ang pundamental na prinsipyo ng Moral Governance, at ang tungkulin at istruktura ng Bangsamoro Transition Authority Parliament. Binigyang-diin na ang kaalaman at pagpapahalaga sa kasaysayan at etika ng pamumuno ay mahalagang sandigan ng mabuting pamamahala at pangmatagalang kapayapaan sa Bangsamoro.

Pinangunahan ang sesyon ni Shaykh Aquil Hadji Manan, kasama sina Mar’atol Hosna R. Shiek at Dhoha S. Mambuay, na kapwa naglatag ng malinaw na panawagan para sa etikal na pamumuno, tapat na paglilingkod-bayan, at aktibong partisipasyon ng kabataan bilang mga susi sa inklusibo at responsableng pamahalaan.

Bahagi ito ng serye ng mga community conversations ng OMPSS, kasunod ng kaparehong Bangsamoro 101 na isinagawa sa Pantar, Lanao del Norte, sa pagdiriwang ng ika-7 anibersaryo ng Bangsamoro Autonomous Region in Muslim Mindanao. Pinatutunayan nito ang tuloy-tuloy na adbokasiya ng OMPSS na ilapit ang kaalaman sa mamamayan at palakasin ang makabuluhang pakikilahok sa pamamahala.

Sa pamamagitan ng ganitong mga inisyatiba, pinatitibay ng OMPSS ang paniniwalang ang isang may-alam, may paninindigan, at may pagpapahalagang mamamayan ang tunay na gulugod ng isang makatarungan, mapayapa, at matatag na Bangsamoro.