Umabot sa kabuuang 255 Badjao beneficiaries mula sa tatlong bayan sa lalawigan ng Sulu ang matagumpay na tumanggap ng rice subsidy mula sa Ministry of Social Services and Development (MSSD) sa ilalim ng Layag Badjao Program, na isinagawa noong Pebrero 3–4, 2026.

Noong Pebrero 3, limampung (50) benepisyaryo mula sa Kalingalan Caluang ang tumanggap ng kanilang rice subsidy, kalakip ang starter kit bilang bahagi ng Basic Business Management Training ng programa—isang hakbang na naglalayong palakasin ang kakayahan sa kabuhayan ng mga benepisyaryo.

Sumunod naman noong Pebrero 4 ang pamamahagi sa Patikul, kung saan siyamnapung (90) Badjao beneficiaries ang tumanggap ng tig-anim na sako ng bigas bilang bahagi ng tulong-pagkain ng pamahalaan.

Bukod dito, 115 Badjao beneficiaries mula sa Talipao ang nakatanggap din ng rice subsidy sa loob ng dalawang araw na payout, patunay ng tuloy-tuloy at inklusibong paghahatid ng serbisyong panlipunan sa mga komunidad ng Badjao.

Sa ilalim ng Layag Badjao Program, bawat benepisyaryo ay tumatanggap ng PHP 1,200 buwanang rice subsidy na layong palakasin ang food security at maibsan ang gastusin sa pagkain ng mga pamilyang kabilang sa mga mahihirap at bulnerableng sektor.

Ang programa ng MSSD ay nakatuon hindi lamang sa agarang tulong, kundi sa pangmatagalang pag-angat ng kabuhayan at kapakanan ng mga Badjao, sa pamamagitan ng seed capital, skills training, buwanang rice subsidy, at medical assistance—isang malinaw na hakbang tungo sa inklusibo at makataong serbisyong panlipunan sa Bangsamoro.