Tahasang sinabi ni Atty. Benedicto Bacani, convenor ng Independent Election Monitoring Center (IEMC), na malubha na ang krisis ng tiwala ng mamamayan sa eleksyon sa Bangsamoro—isang sitwasyong aniya’y mas mapanganib kaysa sa simpleng usapin ng petsa ng halalan.

Sa pagdinig ng Senado hinggil sa muling pag-reset ng unang Bangsamoro parliamentary elections, iginiit ni Bacani na base sa aktuwal na monitoring ng mga independent observers, nalilito, nawawalan ng tiwala, at nagiging mapagduda ang publiko dahil sa sunod-sunod na pagbabago ng mga patakaran sa eleksyon.

Ayon sa kanya, ang patuloy na pag-amyenda ng election rules habang isinasagawa na ang preparasyon ay nagdudulot ng hinala sa taumbayan na sinasadya ang kaguluhan upang hindi matuloy ang halalan. Aniya, kapag ang tiwala sa eleksyon ay gumuho, kasunod nitong bumabagsak ang tiwala sa buong institusyon ng pamahalaan.

Binigyang-diin din ni Bacani na ang kawalan ng malinaw na koordinasyon sa pagitan ng BTA at COMELEC ay nagpapalalim sa krisis. Sa mata ng publiko, aniya, walang malinaw na direksiyon kung sino ang may hawak ng proseso, at kung aling mga patakaran ang umiiral.

Babala pa niya, ang binagong paraan ng pagboto para sa mga sektor—lalo na ang kababaihan at settler communities—ay maaaring mauwi sa pagkawala ng tunay na representasyon, dahil sa at-large voting na madaling maimpluwensiyahan ng makinaryang politikal.

Sa huli, iginiit ni Bacani na ang Bangsamoro ay nasa mapanganib na yugto, kung saan ang patuloy na kalituhan sa eleksyon ay maaaring magbukas ng mas malalim na krisis sa pamamahala. Aniya, ang eleksyon ay hindi lamang tungkol sa pagboto—ito ay pundasyon ng lehitimasyon ng pamahalaan.