Mariing tinanggihan ni Senate Majority Leader Juan Miguel “Migz” Zubiri ang panukalang muling ipagpaliban ang unang regular Bangsamoro Parliamentary Elections hanggang 2028, iginiit na ang naturang hakbang ay mapanganib at maaaring magbunsod ng panibagong kaguluhan sa Bangsamoro.

Sa kanyang emosyonal at prangkang talumpati sa Senado kaugnay ng panukalang pag-reset ng halalan sa Setyembre 2026, inamin ni Zubiri na mula pa noong gabi bago niya i-sponsor ang panukala ay sunod-sunod ang panawagan sa kanya upang ipagpaliban na lamang ang halalan at isabay ito sa national elections sa 2028. Subalit mariin niyang sinabi na hindi na ito maaari.

“Hindi na po puwede iyon. Magkaka-giyera na doon sa atin,” babala ni Zubiri, sabay-diin na ang patuloy na postponement ay magbibigay ng impresyon na ang Bangsamoro Parliament ay hindi na autonomous kundi isang “appointed forever parliament.”

Ayon sa senador, ang ganitong persepsyon ay may mabigat na implikasyong pampulitika at pangkapayapaan. Aniya, kapag nawala ang kredibilidad ng democratic transition at nanatiling appointment-based ang pamahalaan sa Bangsamoro, muling mabubura ang tiwala ng mamamayan at maaaring bumalik ang rehiyon sa siklo ng alitan at armadong tunggalian.

Bilang pangunahing sponsor ng Bangsamoro Organic Law, iginiit ni Zubiri na ang halalan ay hindi simpleng teknikal na proseso kundi isang kritikal na haligi ng peace process. Ang patuloy na pagpapaliban, ayon sa kanya, ay tahasang pagsira sa ipinangakong paglipat mula sa rebolusyonaryong lehitimasyon tungo sa demokratikong mandato.

Direkta ring binalaan ni Zubiri ang mga nagtutulak ng 2028 synchronization na tuluyan nang talikuran ang ideya. “Please take that out of your mindset,” aniya, sabay giit na habang naroon siya sa Senado at may katuwang sa Kongreso, hindi pahihintulutan ang panibagong postponement.

Sa huli, mariin niyang iginiit na dapat nang tapusin ang mahabang transisyon at itakda na ang Bangsamoro Parliamentary Elections sa Setyembre 2026—bilang huling hakbang upang maiwasan ang paglala ng tensiyon at tuluyang maitaguyod ang isang halal, lehitimo, at mapayapang Bangsamoro government.