Isang makasaysayang pagtitipon ang naganap sa Butig, Lanao del Sur noong Pebrero 12, 2026 matapos pormal na pagtibayin ang isang Manifesto sa ginanap na Ranaw Assembly ng Moro Islamic Liberation Front (MILF), na dinaluhan ng mahigit tatlumpu’t apat na libo (34,000) miyembro at tagasuporta.

Ipinakita ng dambuhalang pagtitipon ang lawak ng pagkakaisa, disiplina, at matibay na paninindigan ng Ranaw base sa patuloy na pagsusulong ng kapayapaan at sa ganap na pagpapatupad ng Comprehensive Agreement on the Bangsamoro.

Pinangunahan ang aktibidad ng matataas na opisyal ng MILF, kabilang si Mohagher Iqbal, miyembro ng MILF Central Committee at Chair ng MILF Peace Implementing Panel, kasama ang iba pang kinatawan ng Central Leadership.

Si Al Haj Murad Ebrahim, Chairman ng MILF, ay kinatawan ng kanyang anak na si Yasser Ebrahim, na nagbigay-diin sa kahalagahan ng patuloy na pagkakaisa at kolektibong pananagutan sa pagprotekta sa mga napagtagumpayang kasunduan sa ilalim ng peace process.

Dumalo rin ang mga kasapi ng MILF mula sa Lanao del Norte at Iligan City, patunay ng mas malawak na suporta ng mga komunidad sa labas ng Lanao del Sur sa adyenda ng pagkakaisa at kapayapaan. Ipinakita ng kanilang presensya na ang paninindigan para sa tapat na implementasyon ng kasunduan ay hindi lamang limitado sa isang lalawigan kundi kolektibong adhikain ng mga komunidad ng MILF sa iba’t ibang lugar.

Ang naturang assembly ay itinuturing ng mga tagamasid bilang malinaw na demonstrasyon ng patuloy na organisadong lakas ng hanay ng MILF at ng kanilang commitment sa political track ng Bangsamoro peace process.