Naglabas ng opisyal na clarificatory statement ang Ministry of Basic, Higher and Technical Education – BARMM (MBHTE-BARMM) kaugnay ng implementasyon ng Joint Memorandum na may petsang Pebrero 5, 2026 hinggil sa transition ng operasyon ng Basic Education Services sa Sulu, kasunod ng magkasanib na direktiba ng Department of Education (DepEd) at ng ministeryo.

Sa inilabas na pahayag, binigyang-diin ng MBHTE-BARMM na malinaw na itinakda sa nasabing Joint Memorandum na ang responsibilidad ng ministeryo ay nakatuon lamang sa pagbabayad ng sahod at benepisyo ng lahat ng teaching at non-teaching personnel na saklaw ng Personal Services (PS). Samantala, ang Maintenance and Other Operating Expenses (MOOE) ay mananatiling popondohan at ilalabas ng Department of Education sa panahon ng transition.

Dahil dito, tahasang nilinaw ng MBHTE-BARMM na tanging PS funds lamang ang maaaring gamitin at ito ay eksklusibo para sa suweldo at benepisyo ng mga umiiral na kawani. Wala umanong awtoridad, kustodiya, o kontrol ang ministeryo sa MOOE funds habang umiiral ang transition arrangement.

Bunsod ng paglilinaw na ito, ipinahayag din ng ministeryo na ang anumang gastusin na chargeable sa MOOE, kabilang ang renewal o bagong engagement ng Islamic Studies and Arabic Language (ISAL) teachers, ay hindi awtorisado sa ilalim ng MBHTE-BARMM sa kasalukuyang yugto. Anumang naunang anunsyo o issuance na hindi umaayon sa bagong paglilinaw ay itinuturing na binawi at walang bisa habang nagpapatuloy ang transition period.

Mahigpit na inatasan ng ministeryo ang lahat ng kinauukulang tanggapan na sundin ang probisyon ng Joint Memorandum at ang kasalukuyang paglilinaw. Binigyang-babala rin na ang anumang hakbang na salungat dito ay ituturing na walang bisa.

Ang nasabing pahayag ay inaasahang magbibigay linaw sa implementasyon ng transisyon ng basic education services sa Sulu at magtatakda ng malinaw na hangganan ng pananagutan sa pagitan ng MBHTE-BARMM at ng Department of Education habang isinasagawa ang paglipat ng operasyon.