MAGSISIMULA ang mas pinaigting na laban kontra malnutrisyon sa Maguindanao del Sur matapos magsagawa ng courtesy call ang Department of Social Welfare and Development Field Office XII (DSWD XII) sa Pamahalaang Panlalawigan upang pormal na makipag-ugnayan para sa implementasyon ng Bangsamoro Umpungan sa Nutrition (BANGUN) Feeding Program sa lalawigan.

Nakipagpulong ang delegasyon ng DSWD XII kay Nur-Ali U. Midtimbang, Provincial Administrator, upang ilahad ang layunin, saklaw, at target beneficiaries ng 2026 BANGUN Feeding Project. Layunin ng pagbisita na palakasin ang koordinasyon sa pagitan ng DSWD at ng Provincial Local Government Unit (PLGU) upang matiyak ang maayos at epektibong implementasyon ng programa.

Ayon sa DSWD XII, kabilang sa mga target na lugar para sa 2026 rollout ang mga bayan ng Datu Anggal Midtimbang at Shariff Aguak. Saklaw ng programa ang mga batang may edad 0–12 taong gulang sa komunidad, paaralan, at mga madaris, gayundin ang mga buntis at nagpapasusong ina—bilang hakbang upang mabawasan ang insidente ng malnutrisyon sa lalawigan.

Nagpahayag naman ng pasasalamat ang Pamahalaang Panlalawigan sa inisyatiba at tiniyak ang kanilang buong suporta sa mga programang nakatuon sa kalusugan at kapakanan ng mga vulnerable sectors, lalo na ng mga bata at ina sa Maguindanao del Sur