Nagbigay-linaw ang Ministry of Basic, Higher and Technical Education (MBHTE) kaugnay sa estado ng education transition at salary disbursements para sa mga guro at personnel ng Schools Division of Sulu, kasunod ng desisyon ng Korte Suprema na nagtanggal sa Sulu mula sa saklaw ng BARMM.

Sa mensahe ni MBHTE Minister Mohagher M. Iqbal, tiniyak ng ahensya na prayoridad ang kapakanan ng teaching at non-teaching personnel sa gitna ng transisyon. Sa ilalim ng Executive Order No. 91, bumuo ng Technical Working Group (TWG) upang pangasiwaan ang maayos na paglipat ng responsibilidad.

Ayon sa mga naunang resolusyon, nakatakdang akuin ng DepEd National ang salary funding simula Enero 2026. Subalit dahil hindi pa natatanggap ng mga personnel sa Sulu ang kanilang kompensasyon hanggang sa mga sumunod na pagpupulong, nagpasya ang MBHTE na ipagpatuloy muna ang pagpopondo sa Personnel Services upang matiyak na walang guro ang maaapektuhan.

Ang komitment na ito ay pinagtibay sa pamamagitan ng Joint Memorandum sa pagitan ng MBHTE at DepEd noong Pebrero 5, 2026, kung saan kinilala na mananatiling responsable ang MBHTE sa paglalabas ng sahod at benepisyo ng SDO Sulu sa fiscal year 2026 habang nagpapatuloy ang transisyon.

Nilinaw din ng MBHTE na ang pag-release ng sahod ay nakadepende sa kumpleto at tamang dokumentasyon mula sa SDO Sulu. Bagama’t nagkaroon ng pagkaantala at kakulangan sa ilang submissions, inihayag na ang sahod para sa Enero 2026 ay ike-credit na sa mga apektadong empleyado. Samantala, kinakailangan ang agarang compliance upang maiproseso ang sahod para sa Pebrero.

Sa pagtatapos ng kanyang pahayag, iginiit ni Minister Iqbal na nananatiling matatag ang MBHTE sa pangakong pangalagaan ang komunidad ng edukasyon, kasabay ng pagsunod sa mga alituntunin ng accounting at auditing, upang matiyak ang maayos at tuluy-tuloy na serbisyo sa gitna ng pagbabago.