Naglabas ng panibagong pagsusuri ang International Crisis Group (ICG) hinggil sa kasalukuyang kalagayan ng peace process sa Bangsamoro Autonomous Region in Muslim Mindanao (BARMM), na ayon sa grupo ay nasa kritikal na yugto habang papalapit ang inaasahang unang parliamentary elections sa 2026.

Sa kanilang pahayag, iginiit ng ICG na ang pagtatatag ng BARMM sa Mindanao ay bahagi ng mas malawak na pagsisikap ng pamahalaan ng Pilipinas at ng Moro Islamic Liberation Front (MILF) upang wakasan ang dekada ng armadong tunggalian at tugunan ang matagal nang panawagan ng mga Moro para sa self-determination.

Ayon sa grupo, ang 2026 elections ay mahalagang hakbang upang makumpleto ang political track ng peace agreement na nagsimula noong 2012 sa pagitan ng pamahalaan ng Pilipinas at ng dating secessionist movement.

Gayunman, binigyang-diin ng ICG na humaharap ngayon ang proseso ng kapayapaan sa seryosong mga hamon. Kabilang sa mga pangunahing balakid ang pagbagal ng decommissioning ng mga armas at pwersa ng rebelde, umano’y interbensyon ng pambansang pamahalaan sa pulitika ng Bangsamoro, mga pag-antala ng halalan, at lumalalim na hidwaan sa loob ng dating mga rebelde.

Nagbabala rin ang grupo na ang mga isyung ito ay maaaring magbunsod ng paglala ng tensyon at pagdami ng mga insidente ng karahasan kung hindi agad matutugunan.

Sa ulat ng ICG, hinimok nito ang pambansang pamahalaan at mga awtoridad sa Bangsamoro na agarang kumilos upang matiyak na hindi mawawasak ang mga nakamit na tagumpay ng peace process.

Ang International Crisis Group ay isang independent international organization na nagsasagawa ng pananaliksik at policy analysis upang makatulong sa pag-iwas at paglutas ng mga armadong tunggalian sa iba’t ibang bahagi ng mundo.