Naghatid ng inspirasyon at konkretong suporta sa mga mag-aaral ang Office of the Vice President – BARMM Satellite Office sa isinagawang pamamahagi ng school bags sa Datu Paglas, Maguindanao del Sur bilang bahagi ng programang PagbaBAGo: A Million Learners Campaign noong Pebrero 21, 2026.

Bumisita ang OVP-BARMM Satellite Office sa Madrasah Ayada Al-Arabie Al-Islamie at Madrasah Al-Iman Al-Islamiah upang ipamahagi ang humigit-kumulang 250 school bags na may kasamang mga gamit pang-eskwela para sa mga mag-aaral ng dalawang madrasah.

Ang naturang inisyatiba ay naglalayong suportahan ang mga kabataang Bangsamoro sa kanilang pag-aaral sa pamamagitan ng pagbibigay ng mga kagamitang makatutulong sa kanilang pang-araw-araw na pag-aaral at paghahanda sa kanilang kinabukasan.

Malaki ang naging pasasalamat at kagalakan ng mga mag-aaral na tumanggap ng mga school bags at school supplies, na ayon sa kanila ay magsisilbing inspirasyon upang lalo pa silang magsikap sa kanilang pag-aaral.

Sa pamamagitan ng PagbaBAGo: A Million Learners Campaign, patuloy na pinapalakas ng OVP-BARMM ang adhikain na maitaguyod ang edukasyon at mabigyan ng pag-asa ang kabataang Bangsamoro, upang mas lalo silang mangarap at maabot ang kanilang mga mithiin sa buhay.