Nagtipon ang Provincial Government of Maguindanao del Sur at ang Maguindanao del Sur Chamber of Commerce sa kanilang First Quarter Meeting noong Marso 30, 2026, upang patatagin ang ugnayan ng pamahalaan at pribadong sektor, at tiyakin ang mas mahigpit na pagsunod sa mga umiiral na regulasyon sa negosyo.

Naging mahalagang bahagi ng pulong ang aktibong partisipasyon ng Bureau of Fire Protection (BFP), kasabay ng paggunita sa Fire Prevention Month, kung saan binigyang-diin ang patuloy na kampanya para sa kamalayan at kahandaan laban sa sunog sa mga komunidad.

Isa sa mga tampok ng aktibidad ang komprehensibong presentasyon ng BFP na naglalayong palalimin ang kaalaman ng mga negosyante hinggil sa fire safety standards. Tinalakay dito ang kahalagahan ng pagsasama ng fire prevention measures sa pang-araw-araw na operasyon ng negosyo bilang bahagi ng responsableng pamamahala.

Nagsilbing resource speaker si Hexter Jan C. Cadavero, Buluan Fire Marshal, na nagbigay-linaw sa proseso at mga kinakailangang dokumento upang makakuha ng Fire Safety Inspection Certificate (FSIC). Binigyang-diin niya na ang FSIC ay hindi lamang legal na requirement kundi isang mahalagang hakbang upang mapangalagaan ang buhay, ari-arian, at puhunan ng mga negosyo.

Naging daan din ang pulong sa bukas na talakayan kung saan nakapagtanong ang mga miyembro ng Chamber of Commerce, nagbahagi ng karanasan, at nakakuha ng agarang tugon mula sa BFP hinggil sa mga isyu sa fire safety compliance.

Sa kabuuan, ipinakita ng inisyatiba ng pamahalaang panlalawigan, katuwang ang BFP, ang matibay na paninindigan na isulong ang kultura ng kaligtasan, kahandaan, at pananagutan sa hanay ng mga negosyante—isang hakbang tungo sa mas ligtas at mas maayos na komunidad.