Isinusulong ang isang inisyatibong magbibigay ng malinis at ligtas na inuming tubig sa komunidad ng Ligawasan matapos talakayin ng Pamahalaan ng nasabing bayan at ng Ministry of Science and Technology (MOST) – BARMM ang isang project proposal hinggil sa paggamit ng water ceramic filter.

Pinangunahan ng mga kinatawan ng MOST ang konsultasyon kung saan inilatag ang mga konkretong plano at posibleng hakbang para sa implementasyon ng proyekto na naglalayong tugunan ang pangangailangan ng mga residente sa ligtas na inuming tubig.

Dinaluhan ito ng mga department heads ng LGU Ligawasan sa pangunguna ni Municipal Administrator/Consultant Omolhayr M. Talembo, na nagbigay-diin sa kahalagahan ng koordinasyon ng iba’t ibang tanggapan upang matiyak ang matagumpay na pagpapatupad ng proyekto.

Sa naturang talakayan, binigyang-pansin ang potensyal ng water ceramic filter technology bilang isang praktikal at abot-kayang solusyon sa water safety, lalo na sa mga komunidad na may limitadong access sa malinis na tubig.

Ayon sa mga opisyal, ang inisyatibong ito ay bahagi ng mas malawak na layunin ng lokal na pamahalaan na mapabuti ang kalusugan ng mamamayan at palakasin ang mga serbisyong panlipunan sa pamamagitan ng makabagong teknolohiya.

Inaasahang magbubukas ang proyekto ng mas matibay na ugnayan sa pagitan ng LGU at mga regional agencies upang maisakatuparan ang mga programang direktang makikinabang ang mga residente ng Ligawasan.