Ipinaliwanag ni Ombudsman Boying Remulla na hindi pinayagan ng pamahalaan ang paglabas ng bansa ni Former Speaker Rep. Martin Romualdez dahil sa umiiral na lookout bulletin order laban sa mga indibidwal na nasa ilalim ng imbestigasyon.

Ayon kay Remulla, may kahilingan na payagan si Romualdez na bumiyahe patungong Singapore para sa medical check-up. Gayunpaman, tumanggi ang pamahalaan na i-lift ang lookout order, dahil maaari itong magdulot ng pagdududa sa publiko at posibleng hindi na bumalik ang nasabing indibidwal sa hurisdiksyon ng bansa.

Binigyang-diin ng kalihim na ang sinumang nasa serbisyo publiko at kasalukuyang iniimbestigahan ay may limitasyon sa pagbiyahe, lalo na kung ito ay papunta sa ibang bansa. Aniya, mahalagang tiyakin na mananatili sa loob ng bansa ang mga sangkot upang mapanagot kung kinakailangan.

Dagdag pa niya, bagama’t may mga iniulat na kondisyon sa kalusugan tulad ng diabetes at sakit sa puso, maaari namang magpagamot sa loob ng bansa, dahil may sapat na kakayahan ang mga lokal na doktor.

Iginiit ni Remulla na ang hakbang ay bahagi ng pag-iingat upang maprotektahan ang interes ng bayan at masiguro na ang mga iniimbestigahan ay hindi makakaiwas sa proseso ng batas.