Isang mahalagang hakbang tungo sa pangmatagalang kapayapaan ang isinagawa matapos pormal na lagdaan ang One Mayors’ Alliance Memorandum of Agreement (MOA) sa Pikit Gymnasium, na pinag-isa ang apat na lokal na pamahalaan mula sa Pikit at Special Geographic Area (SGA).

Pinagbuklod ng kasunduan ang mother municipality na Pikit at ang mga bagong tatag na bayan ng Ligawasan, Malidegao, at Tugunan upang palakasin ang ugnayan sa usapin ng kapayapaan, seguridad, at kaayusan sa kanilang nasasakupan.

Ayon sa mga opisyal, layunin ng alyansa na tiyakin ang mas maayos na koordinasyon sa pagitan ng mga LGU, lalo na sa pagtugon sa mga hamon sa seguridad at pagpapanatili ng katatagan sa mga komunidad.

Dumalo sa seremonya sina Cotabato Governor Emmylou T. Mendoza, BARMM Member of Parliament Kellie Antao, Brig. Gen. Ricky P. Bunayog ng 602nd Infantry Brigade, at mga opisyal ng kapulisan mula sa Cotabato at BARMM, bilang suporta sa inisyatiba ng mga lokal na pamahalaan.

Kabilang din sa mga lumagda sa kasunduan sina Mayor Ismael “Boy Hashim” Sultan Mama ng Ligawasan, Mayor Abdullah P. Abas ng Tugunan, Mayor Arnal M. Timan ng Malidegao, at Mayor Muhyryn D. Sultan-Casi ng Pikit.

Sa kanyang mensahe, binigyang-diin ni Mayor Mama ang kahalagahan ng pagkakaisa sa kabila ng pagkakaiba ng pinagmulan at paniniwala. Aniya, ang tunay na kapayapaan ay nakasalalay sa pagkilala na iisa ang komunidad at hindi dapat manaig ang alitan.

Itinuturing ng mga lider ang One Mayors’ Alliance bilang isang konkretong hakbang upang maiwasan ang sigalot, mapanatili ang kaayusan, at mapalakas ang tiwala sa pagitan ng pamahalaan at mamamayan.

Sa kabuuan, anila, ang nasabing kasunduan ay hindi lamang pormal na dokumento kundi isang kolektibong pangako ng mga lider na isulong ang mas ligtas, maayos, at mapayapang kinabukasan para sa buong Bangsamoro.