Naglabas ng Appointment Order No. 1-2026 ang Moro Islamic Liberation Front Central Committee kaugnay ng pagtatalaga ng mga bagong Officers-in-Charge (OIC) para sa ilang Base Commands ng Bangsamoro Islamic Armed Forces.

Batay sa dokumento, layunin ng hakbang na mapanatili ang operational continuity, disiplina, at epektibong command structure sa loob ng organisasyon, kasabay ng pagpapatupad ng mga polisiya at direktiba ng MILF leadership.

Kabilang sa mga itinalagang OIC ang mga mamumuno sa Base Commands 104, 105, 114, 118, 123, 124, at 128. Nakasaad din sa kautusan na agad nilang gagampanan ang kanilang mga tungkulin at responsibilidad sa kani-kanilang hurisdiksyon.

Binigyang-diin sa naturang order ang pagpapatuloy ng pagsunod sa ceasefire agreement at observance ng cessation of hostilities sa pagitan ng MILF at ng Gobyerno ng Pilipinas.

Ang kautusan ay inilabas noong Abril 30, 2026 sa Camp Darapanan sa panahon ng regular na pagpupulong ng MILF Central Committee.