Kinumpirma ng Moro Islamic Liberation Front (MILF) Central Committee ang pagpapatibay sa Resolution No. 1, Series of 2026, na nag-uutos ng pagsuspinde kay Abdulraof “Sammy” Macacua bilang Chief of Staff ng Bangsamoro Islamic Armed Forces (BIAF).

Sa inilabas na opisyal na pahayag, sinabi ng Central Committee na ang desisyon ay isinagawa matapos ang masusing pagrepaso at pagtalakay ng mga usaping iniharap sa pamunuan ng organisasyon. Ayon dito, ang hakbang ay bahagi ng kanilang mandato upang mapanatili ang integridad ng MILF, maitaguyod ang disiplina sa hanay ng mga miyembro, at matiyak ang pagsunod sa mga alituntunin at kolektibong pasya ng organisasyon.

Binigyang-diin ng MILF na ang suspensyon ay isang panloob na hakbang na nakabatay sa prinsipyo ng pananagutan at paggalang sa umiiral na istruktura ng pamumuno sa loob ng BIAF. Layunin din umano nitong mapanatili ang katatagan ng organisasyon habang dinadaan sa wastong proseso ang mga isyung may kaugnayan sa liderato at disiplina.

Nanawagan ang Central Committee sa lahat ng commanders, opisyal, miyembro, at mga tagasuporta ng MILF at BIAF na igalang ang naturang resolusyon, panatilihin ang pagkakaisa ng organisasyon, at patuloy na gampanan ang kani-kanilang tungkulin alinsunod sa mga direktiba ng pamunuan.

Kasabay nito, muling tiniyak ng MILF ang kanilang patuloy na dedikasyon sa pagsusulong ng adhikain ng Bangsamoro, pagpapatuloy ng prosesong pangkapayapaan, at pagtataguyod ng kapakanan ng mamamayang Bangsamoro.

Hinimok din ng pamunuan ang publiko, media, at iba pang sektor na umasa lamang sa mga opisyal na pahayag ng MILF at iwasan ang pagpapakalat ng hindi beripikadong impormasyon na maaaring magdulot ng kalituhan at makaapekto sa pagkakaisa ng organisasyon.

Ang press statement ay inilabas noong Hunyo 5, 2026 bilang opisyal na paglilinaw at pagpapatibay sa naging pasya ng MILF Central Committee kaugnay ng usapin ng liderato sa loob ng BIAF.