Nakarating na sa General Santos City ang mga relief goods mula sa Ministry of Social Services and Development (MSSD) na nakalaan para sa mga pamilyang naapektuhan ng 7.8 magnitude na lindol sa Brgy. Mabila, Sarangani, Davao Occidental.

Inaasahang ipamamahagi ngayong araw ang naturang humanitarian assistance na binubuo ng 500 sakong bigas, 500 dignity kits, 500 cooking kits, 500 trapal, 500 water kits, at 150 infant kits para sa mga residenteng naapektuhan ng kalamidad.

Ayon sa MSSD, layunin ng agarang paghahatid ng tulong na matugunan ang mga pangunahing pangangailangan ng mga pamilyang naapektuhan habang patuloy ang kanilang pagbangon mula sa pinsalang dulot ng malakas na lindol.

Patuloy namang nakikipag-ugnayan ang mga kinauukulang ahensya upang matiyak ang maayos at mabilis na distribusyon ng mga relief goods sa mga benepisyaryong komunidad.