Muling tiniyak ng Office of the Presidential Adviser on Peace, Reconciliation and Unity (OPAPRU) ang matatag na pangako ng Pamahalaan ng Pilipinas sa ganap na pagpapatupad ng Comprehensive Agreement on the Bangsamoro (CAB) at sa patuloy na pagsusulong ng Bangsamoro peace process.

Sa isang pahayag na inilabas noong Hunyo 24, sinabi ng OPAPRU na nananatiling nakatuon ang pamahalaan sa pagtataguyod ng isang mapayapa, matatag, maunlad, at may sariling pamamahalang Bangsamoro habang pinangangalagaan ang mga tagumpay na bunga ng kasunduang pangkapayapaan.

Binigyang-diin din ng ahensya ang kahalagahan ng pagpapatuloy ng mga peace mechanisms at ang pagsasama ng mahahalagang prayoridad ng peace process sa panukalang 2027 national budget upang matiyak ang sapat na suporta at pondo para sa mga programang pangkapayapaan.

Habang hinihintay ang paghirang ng bagong Chairperson ng Government Peace Implementing Panel, sinabi ng OPAPRU na nananatiling aktibong nakikibahagi ang Office of the President sa pagpapatupad ng CAB. Iginiit din nito na nananatiling matatag ang suporta ni Pangulong Ferdinand R. Marcos Jr. sa pagpapatuloy ng Bangsamoro peace process.

Kasabay ng paghahanda ng BARMM para sa kauna-unahang parliamentary elections, nanawagan ang OPAPRU sa lahat ng sektor na tiyakin ang mapayapa, maayos, at kapani-paniwalang halalan. Ayon sa ahensya, mahalagang mapangalagaan ang integridad ng proseso ng halalan at mapanatili ang kapayapaan bilang magkatuwang na responsibilidad ng pamahalaan at ng mamamayan.

Nilinaw rin ng OPAPRU na ang lahat ng kanilang mga programa at inisyatiba ay nakabatay lamang sa mandato ng ahensya at hindi dapat ituring na pakikialam sa proseso ng halalan o pagsuporta sa alinmang partido o kandidato. Binigyang-diin nitong nananatili itong mahigpit na non-partisan at nakatuon lamang sa pagpapaunlad ng kapayapaan, kaunlaran, at pagpapatuloy ng mga institusyong naitatag sa ilalim ng CAB.

Sa huli, hinikayat ng OPAPRU ang mga lokal na pamahalaan, civil society organizations, religious leaders, youth at women groups, pribadong sektor, media, at lahat ng mamamayang Bangsamoro na patuloy na maging katuwang sa pagsusulong ng kapayapaan, mabuting pamamahala, at inklusibong pag-unlad para sa susunod na henerasyon.