MADIA, Datu Saudi Ampatuan, Maguindanao del Sur — Isinagawa ng United Bangsamoro Justice Party (UBJP) ang General Assembly at Voter’s Education Program nitong Martes, Hunyo 30, bilang bahagi ng mas pinaigting na paghahanda ng partido para sa kauna-unahang Parliamentary Elections sa Bangsamoro Autonomous Region in Muslim Mindanao (BARMM).

Dinaluhan din ang programa ng ilang pangunahing personalidad ng Bangsamoro, kabilang sina MILF First Vice Chairman at UBJP Vice President Mohagher Iqbal, Sheikh Abbas Kudandeng, OIC Front Commander ng Central Mindanao Front, Mansoor Ebrahim, kinatawan at anak ni MILF Chairman Al Haj Murad Ebrahim, Aida Silongan ng Social Welfare Committee (SWC), Anwar Alamada, kilala bilang “Young Fighter” at kandidato sa ika-5 Distrito ng Maguindanao del Sur, gayundin ang iba pang mga commander ng Bangsamoro Islamic Armed Forces (BIAF).

Sentro ng programa ang pagpapalawak ng kaalaman ng mga botante hinggil sa parliamentary system, proseso ng halalan, at kahalagahan ng responsableng pagboto upang makapili ng mga lider na may integridad, pananagutan, at tunay na malasakit sa Bangsamoro.