Dumalo at nagbigay ng mensahe si Moro Islamic Liberation Front Central Committee (M!LF-CC) Chairman at United Bangsamoro Justice Party (UBJP) President Al Haj Murad Ebrahim sa Union of Bangsamoro Scholars–Jordan Alumni Assembly na ginanap sa MILF-CC Gymnasium.

Pinangunahan ni Sheikh Shaidy Mama Montañer ang pagtitipon na naglalayong palakasin ang pagkakaisa at solidarity ng mga Bangsamoro scholars na nagtapos sa iba’t ibang institusyong pang-akademiko sa Jordan at ngayon ay naglilingkod sa Bangsamoro sa iba’t ibang larangan.

Naging bahagi rin ng assembly ang pagbibigay ng organizational updates at pagtalakay sa mahahalagang usapin hinggil sa internal at external affairs ng organisasyon.

Sa kanyang mensahe, binigyang-diin ni Al Haj Murad ang mahalagang papel ng samahan sa pagbubuklod at pag-uugnay ng mga Bangsamoro scholars na nag-aral sa Jordan, lalo na sa kanilang kontribusyon sa Islamic da’wah, edukasyon, at moral at intelektuwal na pag-unlad ng Bangsamoro.

Nagpaabot din siya ng malalim na pagpapahalaga sa mga iskolar sa kanilang pag-aalay ng buhay sa tinawag niyang isa sa mga marangal na anyo ng jihad—ang paghahanap, pangangalaga, at pagpapasa ng kaalamang Islamiko.

Binigyang-diin ni Murad na ang patuloy na dedikasyon ng mga iskolar sa pag-aaral at pagtuturo ng Islam ay nakatutulong sa pagpapatatag ng espirituwal na pundasyon ng Bangsamoro at nagsisilbing inspirasyon sa susunod na henerasyon na panindigan ang pananampalataya, paglilingkod, at moral na pamumuno.