Pinagpapaliwanag ng Ministry of the Interior and Local Government (MILG) ang isang barangay chairman sa Cotabato City kaugnay ng reklamong nag-aakusa ng umano’y iregularidad sa paggamit at paglalabas ng pondo ng barangay na umaabot sa ₱6.88 milyon.

Sa Memorandum Order No. 112, Series of 2026, na may petsang Agosto 19, 2026, inatasan ng MILG si Zailon A. Kasan, Punong Barangay ng Tamontaka III, na magsumite ng nakasulat na paliwanag sa loob ng 72 oras mula sa pagtanggap ng kautusan.

Ayon sa dokumento, ang show cause order ay kaugnay ng isang Verified Complaint-Affidavit na inihain ni Harris B. Mohamad Jr. noong Agosto 10, 2026. Kabilang sa mga reklamong binanggit ang grave misconduct, gross negligence, dereliction of duty, abuse of authority, at iba pang kaugnay na alegasyon hinggil sa umano’y disbursement at/o disposition ng pondo ng barangay.

Nakasaad din sa memorandum na ang mga alegasyon ay may kaugnayan sa 28 transaksiyon na umano’y isinagawa sa loob lamang ng isang araw noong Agosto 6, 2024. Gayunman, ang show cause order ay bahagi ng proseso upang mabigyan ng pagkakataon ang inirereklamong opisyal na magpaliwanag bago matukoy kung may nararapat na administrative action.