Matagumpay na isinagawa ang groundbreaking ceremony para sa konstruksyon ng isang Water System Level II na may apat na tapstands sa Barangay Bitu, Datu Odin Sinsuat.

Pinangunahan ang aktibidad ni Abdulmain Abas, kasama ang mga opisyal ng lokal na pamahalaan at mga residente ng barangay na direktang makikinabang sa proyekto.

Layunin ng inisyatibong ito na magbigay ng sapat, malinis, at ligtas na suplay ng tubig sa komunidad. Sa pamamagitan ng apat na tapstands, inaasahang mas mapapadali ang pag-access ng tubig at mababawasan ang hirap ng mga residente sa araw-araw.

Ayon sa alkalde, ang pondo para sa proyekto ay nagmula sa 20% Development Fund ng lokal na pamahalaan. Dagdag pa niya, ang Barangay Bitu ay isa lamang sa mga lugar na makikinabang, dahil nakatakda ring ipatupad ang kaparehong proyekto sa iba pang barangay sa mga susunod na araw.

Ipinapakita ng proyektong ito ang patuloy na pagtutulungan ng pamahalaan at komunidad sa pagsusulong ng mas maayos at maunlad na pamumuhay para sa lahat.