Hindi lang plano, kundi direksyon ng pag-asa — ito ang hatid ng 5th BARMM Planners Congress na ginanap sa Davao City, kung saan aktibong lumahok ang Office of the Provincial Planning and Development Coordinator (OPPDC) ng Maguindanao del Sur.

Pinangunahan ni EnP Nulfarid S. Ampatuan, ang delegasyon ng MDS ay nakibahagi sa mga talakayan tungkol sa sustainable mobility, climate-resilient infrastructure, at strategic investments para sa mas konektado at maunlad na Bangsamoro.

Sa dalawang araw na kongreso, binigyang-diin ni Ampatuan ang kahalagahan ng kooperasyon at matalinong pagpaplano upang maisulong ang tunay na inclusive growth — isang pag-unlad na walang maiiwan.

“Ang pagpaplano ay hindi lang tungkol sa proyekto o plano sa papel,” ani Ampatuan. “Ito ay tungkol sa paglalatag ng mas ligtas, mas maayos, at mas inklusibong kinabukasan para sa mga Bangsamoro.”

Habang patuloy na binabagtas ng rehiyon ang landas ng kapayapaan at pag-unlad, nananatiling gabay ng Maguindanao del Sur ang paniniwalang — ang maayos na plano ay daan tungo sa matatag na kinabukasan.