DATU PAGLAS, MAGUINDANAO DEL SUR – Naging mas makahulugan ang pagbubukas ng klase para sa mahigit 200 mag-aaral ng Sepaka Elementary School matapos silang makatanggap ng mga bagong kagamitang pang-eskwela sa ilalim ng Project Kapangagi Joins Brigada Eskwela 2026.

Ang programa ay bahagi ng G.I.V.E. HEART Program ng Pamahalaang Panlalawigan ng Maguindanao del Sur at nagsisilbing isang convergence activity na pinagsasama ang iba’t ibang serbisyong pang-edukasyon upang matulungan ang mga paaralan at mga mag-aaral sa paghahanda para sa panibagong taon ng pag-aaral.

Bukod sa pamamahagi ng mga school bags na may kasamang kagamitang pang-eskwela, isinagawa rin ang mga oryentasyong pang-edukasyon at mga inisyatibang naglalayong pagandahin ang kapaligiran ng paaralan bilang bahagi ng Brigada Eskwela.

Layunin ng Project Kapangagi na matiyak na mas maraming kabataan ang magkakaroon ng maayos at inklusibong akses sa edukasyon. Nakahanay ito sa Sustainable Development Goal (SDG) 4, na nagsusulong ng de-kalidad, patas, at pantay na oportunidad sa pag-aaral para sa lahat.

Sa pamamagitan ng patuloy na pakikipagtulungan ng lokal na pamahalaan, mga guro, magulang, at komunidad, umaasa ang programa na makapagbigay ng mas magandang simula sa bawat mag-aaral at makapag-ambag sa paghubog ng mas maliwanag na kinabukasan para sa kabataang Maguindanaon.