Isang maagang pamaskong handog ang hatid ng Department of Budget and Management (DBM) sa mga kawani ng pamahalaan matapos ianunsyo ang paglalabas ng year-end bonus at ₱5,000 cash gift ngayong Nobyembre 2025.

Ayon kay DBM Secretary Amenah Pangandaman, alinsunod sa Budget Circular No. 2024-3, ang year-end bonus ay katumbas ng isang buwang basic pay, at ito ay ipamamahagi kasabay ng unang payroll ng Nobyembre.

Sa kabuuan, ₱72.93 bilyon ang inilaan ng pamahalaan para sa mga bonus at cash gift na tatanggapin ng mahigit 1.85 milyong mga kawani ng gobyerno, kabilang ang mga sibilyan, militar, at uniformed personnel.

“Ito ay pagkilala sa dedikasyon at serbisyo ng ating mga lingkod-bayan. Nawa’y magsilbi itong inspirasyon sa patuloy ninyong paglilingkod sa bayan,” ayon kay Pangandaman.

Ang hakbang na ito ay patunay ng patuloy na suporta ng pamahalaan sa kapakanan ng mga lingkod-bayan — isang konkretong paraan upang ipadama ang pasasalamat at pagpapahalaga sa kanilang tapat na serbisyo sa sambayanan.