Sa mga kabundukan ng Talayan at Gindolongan, nananatiling buhay ang pangarap ng mga Indigenous People (IP) na magkaroon ng maayos na kabuhayan, edukasyon, at daan tungo sa kaunlaran. At ngayon, unti-unti na itong nagiging realidad sa pamumuno ni Governor Datu Ali M. Midtimbang.

Sa kanyang panayam, binigyang-diin ng gobernador ang malaking agwat ng kalagayan ng mga IP sa bahaging ito ng lalawigan kumpara sa mga nasa hilaga. “Kailangang mabigyan sila ng pantay na oportunidad. Hindi lang tulong, kundi direksyong magdadala sa kanila sa pag-unlad,” ani Gov. Midtimbang.

Isa sa mga pangunahing hakbang ay ang pagbubukas ng 40-kilometrong access road mula Barangay Bubugiron patungong hopper area — isang proyekto sa ilalim ng PRDP na pinondohan ng World Bank. Sa tulong ng lokal na pamahalaan at mga partner agencies, target nitong paigtingin ang konektibidad, kalakalan, at kabuhayan ng mga IP communities.

Bukod dito, bukas din si Gov. Midtimbang sa pag-anyaya ng mga investor upang magtulungan sa pagpapasigla ng lokal na ekonomiya. “Ang pag-unlad ng lalawigan ay dapat maramdaman ng lahat — lalo na ng mga kapatid nating IP,” kanyang binigyang-diin.

Sa ilalim ng kanyang pamumuno, ang Maguindanao del Sur ay hindi lamang nagtatayo ng mga daan — kundi bumubuo ng mga landas ng pag-asa tungo sa inklusibong kaunlaran para sa bawat Maguindanaon.