Kabuuang 1,048 indigent senior citizens mula sa iba’t ibang barangay sa bayan ng Tandubas ang matagumpay na tumanggap ng kanilang financial subsidy sa ilalim ng Social Pension (SocPen) for Indigent Senior Citizens Program, bilang bahagi ng patuloy na pagsisikap ng Bangsamoro Government na maghatid ng serbisyong panlipunan sa mga sektor na higit na nangangailangan.

Isinagawa ang serye ng pamamahagi mula Disyembre 20 hanggang Disyembre 24, 2025, sa pamamagitan ng pinagsamang house-to-house at clustered payout system na ipinatupad ng Ministry of Social Services and Development (MSSD).

Sa ilalim ng programa, bawat benepisyaryo ay tumanggap ng ₱1,000 buwanang pensyon, na nagsisilbing mahalagang pantustos sa kanilang pang-araw-araw na pangangailangan, partikular sa pagkain at maintenance medicines.

Ayon sa MSSD, ang pagpapatupad ng house-to-house payout ay isang strategic at makataong hakbang upang matiyak na ang tulong ay ligtas, mabilis, at direktang naihahatid sa mga senior citizen na may karamdaman, may kapansanan, hindi na kayang bumiyahe, at naninirahan sa mga liblib na komunidad.

Ang Social Pension Program ay isang nationally funded program na ipinatutupad ng MSSD sa buong rehiyon ng BARMM, at bahagi ng mas malawak na mandato ng Bangsamoro Government na palakasin ang social protection, dignidad, at kapakanan ng mga nakatatanda.