Bilang agarang tugon sa pangangailangan ng mga mamamayang naapektuhan ng armadong kaguluhan, kabuuang 1,688 pamilya mula sa bayan ng Tipo-Tipo, Basilan ang tumanggap ng relief assistance mula sa Ministry of Social Services and Development (MSSD).

Isinagawa ang relief operation noong Disyembre 22, 2025, sa Municipal Gymnasium ng Tipo-Tipo, kung saan ang mga benepisyaryo ay pawang mga residente ng mga barangay na direktang naapektuhan ng kamakailang insidente ng armadong tunggalian sa lalawigan.

Bawat pamilyang benepisyaryo ay pinagkalooban ng welfare goods na idinisenyo upang masuportahan ang kanilang agarang pangangailangan sa pagkain. Kabilang sa relief pack ang 25 kilo ng bigas, sari-saring canned goods, at instant coffee.

Naging maayos at matagumpay ang pamamahagi sa pangunguna ng MSSD Basilan Coordinating Office (BCO), katuwang ang Municipal Social Welfare Office ng Tipo-Tipo at ang Basilan Provincial Disaster Risk Reduction and Management Office (BPDRRMO).

Ang naturang inisyatibo ay bahagi ng Emergency Relief Assistance (ERA) ng MSSD, isang programang naglalayong magbigay ng agarang tulong at proteksyon sa mga komunidad sa BARMM na nakararanas ng displacement o paglikas dulot ng krisis, kabilang ang armadong tunggalian at iba pang sakuna.