Patuloy na pinapalakas ng Ministry of Basic, Higher and Technical Education ang kalidad ng basic education sa Bangsamoro matapos nitong mamahagi ng learning materials sa Schools Division Office ng Tawi-Tawi sa ilalim ng flagship program nitong Project Improving Quality Basic Education in the Bangsamoro (IQBAL).

Sa nasabing pamamahagi, mahigit animnapung (60) pampubliko at primaryang paaralan mula sa iba’t ibang bayan sa Tawi-Tawi ang tumanggap ng mga kagamitang panturo na layong suportahan ang mga guro at mag-aaral, lalo na sa mga liblib at geographically isolated areas ng lalawigan. Kabilang sa mga benepisyaryo ang mga elementarya, primary schools, at national high schools, pati na rin ang mga specialized institutions gaya ng Tawi-Tawi School of Fisheries at Boloboc Science and Technology High School.

Ayon sa MBHTE, bahagi ito ng mas malawak na layunin ng Project IQBAL na tiyaking may sapat, angkop, at de-kalidad na learning resources ang mga paaralan sa Bangsamoro upang mapabuti ang learning outcomes at mabawasan ang education gap sa mga malalayong komunidad.

Binigyang-diin ng kagawaran na ang pamamahagi ng learning materials ay hindi lamang logistical support, kundi isang konkretong hakbang sa pagpapatupad ng inclusive at equitable education system, kung saan walang mag-aaral ang naiiwan dahil sa kakulangan ng pasilidad o kagamitang panturo.

Sa patuloy na implementasyon ng Project IQBAL, muling pinagtitibay ng MBHTE ang paninindigan ng Bangsamoro Government na ang edukasyon ang pundasyon ng pangmatagalang kapayapaan, kaunlaran, at paghubog ng susunod na henerasyon ng Bangsamoro.