Ipinamalas ang konkretong malasakit sa kalusugan ng mamamayang Bangsamoro matapos pangunahan ng Tanggapan ni Mohagher Iqbal, katuwang ang Ministry of Health BARMM sa ilalim ng Bangsamoro Health Outreach Program for Everyone (B-HOPE), ang pamamahagi ng ₱1.5 milyong cash assistance sa mga piling ospital sa Cotabato City at karatig-munisipalidad noong Enero 29, 2026.

Layunin ng tulong-pinansyal na palakasin ang kakayahan ng mga ospital na maghatid ng de-kalidad, episyente, at abot-kayang serbisyong medikal, lalo na para sa mga pasyenteng higit na nangangailangan ng agarang lunas at pangangalaga.

Sa pamamahagi, tumanggap ng ₱500,000 ang Datu Blah T. Sinsuat District Hospital, habang tig-₱250,000 naman ang ipinagkaloob sa Notre Dame Hospital, Bangsamoro Doctors Hospital, Cotabato Regional and Medical Center, at Cotabato Sanitarium and General Hospital.

Ang inisyatibong ito ay bahagi ng patuloy na pagsisikap ng pamahalaang Bangsamoro na patibayin ang healthcare system, suportahan ang mga institusyong medikal, at tiyaking may sapat na kakayahan ang mga ospital sa pagtugon sa pangangailangan ng komunidad. Muli nitong pinagtitibay ang paninindigan ng pamahalaan na ang kalusugan ay pangunahing karapatan at pundasyon ng kaunlaran.