Pinangunahan ni Al Haj Murad Ebrahim, Chairman ng Moro Islamic Liberation Front Central Committee at Pangulo ng United Bangsamoro Justice Party, ang First General Assembly ng UBJP Security Team na ginanap sa MILF-CC Gymnasium—isang makasaysayang pagtitipon na naglatag ng malinaw na direksiyon sa disiplina, pagkakaisa, at moral na paninindigan ng hanay ng seguridad ng partido.

Sa temang “Strengthening Faith, Building Unity and Solidarity,” binigyang-diin ni Chairman Murad ang kahalagahan ng kolektibong layunin at matatag na ugnayan ng bawat kasapi, hindi lamang sa tapat na pagtupad sa kanilang tungkulin kundi sa pangangalaga ng integridad, Islamic values, at pananagutang panlipunan sa paglilingkod sa mamamayan.

Sa kanyang talumpati, iginiit ng lider ng MILF at UBJP na ang katatagan, pagtitiyaga, at sakripisyo ang mga haliging nagbigay-lakas sa mga mujahideen noon, patuloy na gumagabay sa kasalukuyan, at magsisilbing pamana sa susunod na henerasyon—sa kabila ng mga personal at panlahatang pagsubok na maaaring harapin.

Ang pagtitipon ay nagsilbing malinaw na patunay ng di-natitinag na paninindigan ng pamunuan ng MILF at UBJP sa nagkakaisang pamumuno, prinsipyadong serbisyo, at adbokasiya para sa pangmatagalang kapayapaan at makabuluhang kaunlaran sa Bangsamoro homeland.