Dumulog sa Supreme Court of the Philippines ang Save Bangsamoro Movement, isang grupong nakabase sa Bangsamoro Autonomous Region in Muslim Mindanao (BARMM), upang kuwestiyunin ang pagkaka-appoint ng pitong (7) miyembro ng Bangsamoro Transition Authority (BTA) na umano’y hindi kabilang sa Moro Islamic Liberation Front (MILF).

Ayon sa grupo, ang naturang mga appointment ay labag sa umiiral na batas, partikular sa Article XVI, Section 2 ng Bangsamoro Organic Law, na malinaw na nagtatakda na ang komposisyon ng BTA ay dapat mas binubuo ng mga kinatawan mula sa MILF, bilang pangunahing katuwang ng pamahalaan sa pagpapatupad ng peace agreement at sa pagsasaayos ng pamahalaang Bangsamoro sa panahon ng transisyon.

Iginiit ng Save Bangsamoro Movement na ang paglihis sa itinakdang balanse ng representasyon ay hindi lamang teknikal na usapin, kundi may malalim na implikasyon sa kredibilidad, legalidad, at lehitimasyon ng transisyonal na pamahalaan ng BARMM. Anila, ang BTA ay nilikha bilang mekanismo ng implementasyon ng kasunduang pangkapayapaan, kaya’t ang pagsunod sa probisyon ng Bangsamoro Organic Law ay mahalaga upang mapanatili ang tiwala ng mamamayan at ng mga sektor na naging bahagi ng peace process.

Sa pamamagitan ng pagdulog sa Korte Suprema, hiniling ng grupo na suriin at linawin ang konstitusyonal at legal na batayan ng naturang mga appointment, at tiyaking ang espiritu at letra ng Bangsamoro Organic Law ay ganap na naipatutupad sa pamamahala ng BARMM.