Malinaw at bukas na tinalakay ang mahahalagang usaping politikal at panlipunan sa Bangsamoro sa ginanap na CSAT/CSO dialogue forum, matapos pangunahan nina Mohagher Iqbal, MILF Implementing Panel Chairman at Member of Parliament, at Mohajirin Ali, Director General ng Bangsamoro Planning and Development Authority (BPDA), ang afternoon session ng talakayan.

Sa isang masinsinang question-and-answer session, inilatag at hinarap ng mga panauhing tagapagsalita ang mga kritikal na tanong at pananaw ng civil society hinggil sa pagkaantala at binagong timeline ng parliamentary elections, posisyon ng MILF na ituloy ang halalan sa lalong madaling panahon, at mga update mula sa mga nagdaang pulong ng mga implementing panel.

Kasama rin sa mga tinalakay ang mga usapin sa edukasyon, estado ng amnesty program, camp transformation and development, block grant, ang pagkakabukod ng Sulu, at ang mga reaksyon sa mga amyenda sa Bangsamoro Electoral Code. Ayon sa mga dumalo, naging mahalagang espasyo ang forum upang mapalalim ang pag-unawa ng civil society at makabuo ng pinagkaisahang tindig sa mga isyung may direktang epekto sa kinabukasan ng rehiyon.

Ang aktibidad ay bahagi ng political dialogue program ng Initiatives for International Dialogue (IAG), na isinasakatuparan sa tulong ng Australia in The Philippines, bilang suporta sa inklusibo, transparent, at makabuluhang usapang pangkapayapaan at pamamahala sa Bangsamoro.