Panibagong komunidad na naman ang naabot ng Ramadhan Mobile Free Market ng United Bangsamoro Justice Party (UBJP) matapos itong isagawa sa Barangay Mangadeg kung saan humigit-kumulang 180 pamilyang Muslim ang nakatanggap ng free market goods.

Isinagawa ang aktibidad katuwang ang Office of the Vice Governor ng Maguindanao del Sur sa pamumuno ni Hisham S. Nando, bilang suporta sa mga pamilyang nag-aayuno sa panahon ng banal na buwan ng Ramadhan.

Ang Ramadhan Mobile Free Market ay inisyatiba ng UBJP na naglalayong dalhin ang konsepto ng “padiyan” o pamilihan sa mga komunidad na malayo sa mga merkado at nahihirapang makabili ng pagkain para sa kanilang hapag-kainan sa panahon ng Ramadhan.

Sa pamamagitan ng programang ito, patuloy na naihahatid ang tulong at malasakit sa mga komunidad, lalo na sa mga pamilyang nangangailangan ng dagdag na suporta habang ginugunita ang diwa ng pagbabahagi at pagkakaisa ngayong Ramadhan.