Dumalo si Ligawasan Mayor Boy Hashim sa ginanap na Grand Iftar 2026 sa Malacañang Palace na pinangunahan ng Ferdinand Marcos Jr. at inorganisa ng Interim Chief Minister ng Bangsamoro Autonomous Region in Muslim Mindanao na si Abdulraof Macacua.

Ang pagtitipon ay nagbigay pagkakataon sa mga Members of Parliament, Governors, Vice Governors, at mga Local Chief Executives mula sa iba’t ibang bahagi ng Bangsamoro na magsama-sama upang ipagdiwang ang pagpapala ng banal na buwan ng Ramadhan.

Bilang isa sa mga lokal na lider na dumalo, binigyang-diin ng alkalde ang kahalagahan ng pagkakaisa ng mga lider ng Bangsamoro at ng pambansang pamahalaan. Ang sabayang pagbabasag ng pag-aayuno (iftar) ay sumisimbolo sa diwa ng pananampalataya, kapatiran, at sama-samang hangarin na mapanatili ang kapayapaan at kaunlaran sa Bangsamoro.

Ang pagdalo ng alkalde sa nasabing pagtitipon ay nagpapakita ng kanyang patuloy na pakikiisa sa mga inisyatiba na naglalayong palakasin ang ugnayan ng mga lider at itaguyod ang kapayapaan at pag-unlad sa rehiyon.

Ang nasabing Grand Iftar ay nagsilbing mahalagang sandali ng pagkakaisa at pagtutulungan ng mga lider sa paglilingkod sa sambayanang Bangsamoro.